Litla bókin um ZEN

í þýðingu Gunnars Dal

Allt sem er
í þessum alheimi okkar
kemur frá því
sem ekki er.

Þegar þú skilur undrið mikla,
rót alls sem er,
verður þú eins og það
og þarfnast einskis framar.
Taó Te Ching

Þegar ekkert
er í huga þínum
og hugur þinn
er ekki bundinn
við neitt,
þá fyllist tóm þitt
af undrinu mikla.
To-shan / Tokusan

Þegar þú gengur skaltu ganga,
þegar þú situr skaltu sitja.
umfram allt: Ekki tvístíga.
Yun-men / Ummon

Margir óttast
að tæma hugann.
Þeir halda að þá falli þeir
inn í tómið.
Þeir vita ekki að hugur þeirra
er tómið.
Fáfróður maður
lifir í heimi fyrirbrigðanna
en ekki í heimi andans.
Vitur maður lifir í heimi andans
en ekki í heimi fyrirbrigðanna.
Huang-po / Obaku

Sannleikurinn er í okkur
en við leitum hans í fjarlægð.
Það er harmsaga okkar.
Við erum eins og menn
sem eru að farast úr þorsta,
en vatnið er alls staðar
í kringum okkur.
Hakuin

Eitt er allt.
Allt er eitt.
Þegar þú veist þetta
hættir þú að hafa áhyggjur af því
að vera ekki fullkominn!
Seng-ts’an / Sosan

Þinn eigin hugur
ruglar hugsanir þínar.
Gættu huga þíns
Gömul hæka

Hinn fullkomni maður
notar huga sinn eins og spegil.
Hann tekur ekkert
en hafnar heldur engu.
Hann tekur á móti öllu
en geymir ekkert.
Chang-tzu / Soshi

Það er hugsanlegt
að maður líti út eins og kjáni
en sé það ekki.
Hann gæti líka verið gáfaður maður
en farið vel með það.
Zengetsu

Hvað heyrist
þegar klappað er
Með einni hendi?
Zen þversögn

Þú getur þekkt allan heiminn
án þess að fara neitt.
Þú getur þekkt lög Himinsins
án þess að opna gluggann.
Sannleikurinn er sá
að því legra í burt sem þú ferð
því minna veistu.
Tao Te Ching

Og hér sit ég
í friði og spekt
og geri ekki neitt.
Vorið er komið
og grasið grær af sjálfum sér.
Zenrin